اسلام آباد (این این آئی) وفاقی وزیر اطلاعات ونشریات سینیٹر شبلی فراز نے اپوزیشن جماعتوں کی جانب سے کورونا وائرس پر پارلیمانی کمیٹی کے اجلاس کے بائیکاٹ کے فیصلے کو غیر ذمہ دارانہ قرار دیتے ہوئے کہا ہے کہ پی ڈی ایم قومی مجرم ہے، انکے خلاف قانونی ایکشن ہونا چاہیے،اپوزیشن سیاسی پوائنٹ اسکورنگ کے بجائے حکومت کے ساتھ ملکر کام کرے،ہر چیز پر سیاست نہیں کرنی چاہیے، یکطرفہ فیصلہ نہیں کرنا چاہتے، ہماری ایک ٹیم اپوزیشن سے رابطہ کریگی، ہم اپنا قانونی فریضہ پورا کریں گے،پارلیمنٹ کا اجلاس بلانے کیلئے حکومت اپوزیشن کے ساتھ مشاورت کے لیے رابطہ کریگی۔ بدھ کو اسپیکر قومی اسمبلی اسد قیصر کی زیر صدارت ہونے والے پارلیمانی کمیٹی برائے کورونا اجلاس کے بعد وفاقی وزیر اطلاعات شبلی فراز نے میڈیا سے گفتگو کرتے ہوئے کہاکہ کورونا کی پہلی لہر کو کامیابی سے شکست دی تھی، اب اس کی دوسری لہر پاکستان میں آچکی ہے۔انہوںنے کہاکہ اپوزیشن نے اجلاس میں شرکت نہ کرنے کا فیصلہ کرکے ایک بار پھر اپنی غیر ذمہ داری کا ثبوت دیا ہے، اجلاس میں شرکت نہ کرکے انہوں نے واضح کردیا کہ وہ پارلیمنٹ کو نہیں مانتے، ملک کے مستقبل سے تعلق رکھنے والی صورتحال پر اجلاس کا بائیکاٹ کرکے انہوں نے غلط فیصلہ کیا ہے
