لاہور( این این آئی)وزیراعظم محمد شہباز شریف نے کراچی میں دہشتگردی کے واقعہ کے تناظر میں وزیر اعلی سندھ سید مراد علی شاہ کو ٹیلی فون کیا ۔وزیر اعلی سندھ نے وزیراعظم شہباز شریف کو کراچی پولیس چیف کے دفتر پر دہشتگردوں کے حملے پر تفصیلات سے آگاہ کیا ۔وزیر اعلی سندھ نے حملہ آوروں سے متعلق جمع کئے گئے حقائق سے بھی وزیراعظم کو آگاہ کیا ۔ وزیر اعظم شہباز شریف نے کہا کہ اللہ تعالی کا شکر ہے بڑا جانی نقصان یا تباہی نہیں ہوئی،فورسز نے بڑی بہادری سے حملہ آوروں کا خاتمہ کیا،میری طرف سے تمام افسران اور اہلکاروں کو شاباش دیں۔ وزیراعظم شہباز شریف نے کہا کہ دہشتگردی کے خاتمے کے لئے صوبائی حکومتوں کی استعداد کار بڑھانے میں پوری معاونت کریں گے۔ وزیراعظم شہباز شریف نے بروقت کارروائی اور موقع پر موجود رہنے کے وزیر اعلی سندھ مراد علی شاہ کے جذبے کی تعریف کی۔
