لاہور ( این این آئی) لاہور ہائیکورٹ نے پاکستان تحریک انصاف کے چیئرمین و سابق وزیر اعظم عمران خان کی گاڑی کو ہائیکورٹ کے احاطے میں داخلے کے لئے اجازت کی درخواست مسترد کردی ۔ہائیکورٹ میں جسٹس عابد عزیز شیخ نے بطور انتظامی جج فیصلہ سنایا ، عمران خان کے وکلاء نے گاڑی کو احاطہ عدالت میں لانے کے لیے انتظامی سطح پر ہائیکورٹ سے رجوع کیا تھا ۔پی ٹی آئی رہنما شبلی فراز کی جانب سے دی گئی درخواست میں موقف اپنایا گیا تھا کہ عمران خان کی زندگی کو لاحق خطرات کے پیش نظر پیشی پر سکیورٹی کلیئرنس کروائی جائے۔درخواست میں موقف اپنایا گیا کہ عمران خان کی جان کو شدید خطرات لاحق ہیں، ان کی گاڑی کو ہائیکورٹ کے اندر آنے کی اجازت نہیں دی جارہی، سکیورٹی معاملات کی وجہ سے عمران خان کی گاڑی کو ہائیکورٹ آنے کی اجازت دی جائے۔واضح رہے کہ لاہور ہائیکورٹ نے عمران خان کو حفاظتی ضمانت کی درخواست میں دستخط کی تصدیق کے لئے طلب کیا تھا۔
