اسلام آباد (این این آئی)مجلس شوریٰ (پارلیمنٹ) کا مشترکہ اجلاس (کل)بدھ کوپارلیمنٹ ہاؤس میں منعقد ہو گا۔ ترجمان قومی اسمبلی کے مطابق پارلیمنٹ کے مشترکہ اجلاس کے پیش نظر قومی اسمبلی سیکرٹریٹ کے تمام دفاتر (کل) بدھ کو معمول کے مطابق کھلیں گے۔ ایوان صدر میں 23مارچ کی تقریب کے انعقاد کے پیش نظر قومی اسمبلی سیکرٹریٹ کی جانب سے 21اور 22 مارچ کو دی گئی چھٹیاں منسوخ کر دی گئیں ۔ ترجمان کے مطابق قومی اسمبلی سیکرٹریٹ کے تمام ملازمین کل اپنی حاضری کو معمول کے مطابق یقینی بنائیں۔ دریں اثناء قومی اسمبلی سیکرٹریٹ کی جانب سے جاری بیان کے مطابق پارلیمنٹ کے مشترکہ اجلاس کا شیڈول تبدیل کر دیا گیا ،پارلیمنٹ کا مشترکہ اجلاس مورخہ 10 اپریل کے بجائے 22مارچ کو منعقد ہو گا۔اعلامیہ کے مطابق پارلیمنٹ کا مشترکہ اجلاس مورخہ 10اپریل 2023 کو دن 11 بجے کے بجائے 22 مارچ کو سہ پہر 4 بجے پارلیمنٹ ہاؤس میں منعقد ہو گا۔ اعلامیہ کے مطابق اسپیکر قومی اسمبلی نے مشترکہ اجلاس کے شیڈول میں تبدیلی پارلیمنٹ کے جوائنٹ سیٹنگز رولز 1973 کے قاعدہ 4 کے تحت تفویض شدہ اختیارات کو بروئے لاتے ہوئے کی ہے۔ پارلیمنٹ کا مشترکہ اجلاس کے شیڈول میں تبدیلی کا نوٹیفکیشن جاری کر دیا گیا ۔
