لاہور( این این آئی) پاکستان تحریک انصاف کے رہنما وسابق وزیر اعظم عمران خان نے کہا ہے کہ حالات سے ایسا لگ رہا ہے ہم مارشل لاء کی جانب بڑھ رہے ہیں،معلوم نہیں کہ مجھے نا اہل قرار دے دیا جائے گا یا نہیں ؟لیکن جیل میں ہوں یا باہر پارٹی الیکشن جیتے گی۔انہوں نے امریکی میڈیا کو انٹرویو دیتے ہوئے کہا کہ حکومت انتخابات کروانے سے خوف زدہ ہے، انہیں ڈر ہے کہ ہم الیکشن جیت جائیں گے، مجھے ہٹانے کی ہر ممکن کوشش کی جار ہی ہے۔انہوں نے کہا کہ مجھ پر پہلے ہی قاتلانہ حملہ ہو چکا ہے، میں نہیں جانتا کہ وہ مجھے نا اہل کر پائیں گے یا نہیں؟ اس کی پرواہ بھی نہیں کیونکہ پی ٹی آئی تاریخ کی مقبول ترین پارٹی ہے۔عمران خان نے کہا کہ جیل میں ہوں یا باہر پارٹی الیکشن جیتے گی، آئینی طور پر 90 دن میں الیکشن ہونے تھے، ہمارے دور میں عدالتی کام میں مداخلت نہیں تھی، جیسے پہلے ہوتا آیا جبکہ ہم نے میڈیا میں بھی مداخلت نہیں کی، میڈیا سے کوئی مسئلہ تھا تو ہماری وجہ سے نہیں،اسٹیبلشمنٹ کی وجہ سے تھا۔چیئر مین تحریک انصاف نے کہا کہ عالمی کھلاڑی کے طور پر ساری دنیا گھوما ہوں، مانتا ہوں کہ امیر اور غریب ممالک میں فرق قانون کی حکمرانی کا ہے، ہماری لڑائی ہے کہ طاقتور طبقے کو بھی قانون کے نیچے لایا جائے۔ سابق وزیراعظم نے کہا کہ حالات سے ایسا لگ رہا ہے ہم مارشل لاء کی جانب بڑھ رہے ہیں۔انہوں نے حکام پر خود کو جان سے مارنے کی کوشش کا الزام عائد کرتے ہوئے انہوں نے مزید کہا کہ وہ خوش قسمت ہیں کہ وہ زندہ ہیں۔عمران خان نے کہا کہ پی ٹی آئی تاریخ کی مقبول ترین پارٹی بن چکی ہے۔ایک سوال کے جواب میں عمران خان نے کہا کہ پاکستان کا ایٹمی پروگرام محفوظ رکھنے پرسب کا اتفاق ہے۔
