اسلام آباد (این این آئی)وزیر اعظم محمد شہباز شریف نے کہا ہے کہ محنت کشوں کے حقوق کو پورا کرنا اور لوگوں کو نظام میں حصہ دار بنانا عالمی معیشت کیلئے ایک بنیادی چیلنج ہے۔ پیر کومحنت کشوں کے عالمی دن کے موقع پر اپنے ٹویٹ میں وزیر اعظم نے کہا کہ آج جہاں ہم محنت کش طبقے کو زبردست خراج تحسین پیش کرتے ہیں اور ان کی شراکت کا جشن مناتے ہیں تووہاں حقیقت یہ ہے کہ عالمی منڈیوں میں اتار چڑھائو نے محنت کشوں کی معاشی مشکلات میں بہت اضافہ کیا ہے۔وزیر اعظم نے کہا کہ اجناس کی قیمتوں میں اضافے کی وجہ سے محنت کش لوگ خود کو شدید دباؤ میں محسوس کرتے ہیں۔انہوں نے کہا کہ ترقی کی وہ عمارت جو محنت کی بنیاد پر کھڑی ہے اگر اس کی تعمیر میں بنیادی کردار ادا کرنے والوں کو اس کے ثمرات سے محروم رکھا جائے تو وہ ٹوٹ پھوٹ کا شکار ہو جائے گی۔ وزیر اعظم نے کہا کہ محنت کشوں کے حقوق کو پورا کرنا اور لوگوں کو نظام میں حصہ دار بنانا عالمی معیشت کے لیے ایک بنیادی چیلنج ہے
