اسلام آباد (این این آئی )وفاقی حکومت نے سپریم کورٹ پریکٹس اینڈپرویسجرل قانون کے خلاف درخواستیں مستردکرنیکی استدعا کردی۔وفاقی حکومت نے درخواستوں کیخلاف 8 صفحات کا جواب سپریم کورٹ میں جمع کرایا جو ایڈیشنل اٹارنی جنرل عامر رحمان نے جمع کرایا۔وفاقی حکومت کے جواب میں کہا گیا کہ قانون کے خلاف درخواستیں انصاف کے عمل میں رکاوٹ ڈالنے کی کوشش ہے اور درخواست گزاروں کی قانون کو چیلنج کرنے میں نیت صاف نہیں۔وفاقی حکومت کے جواب میں کہا گیا کہ پارلیمنٹ کے قانون سازی کے اختیار پر کوئی قدغن نہیں، ماسٹر آف روسٹر کے تصور کو قانونی تحفظ حاصل نہیں، قانون سے چیف جسٹس کا آئین کے آرٹیکل 184/3 کا اختیار ریگولیٹ ہوگا، اس قانون سے عدلیہ کے اختیارات میں کمی نہیں ہوگی، قانون میں آرٹیکل 184/3 کے اختیار میں اپیل کا حق دیا گیا ہے۔جواب میں کہا گیا کہ آئین کا آرٹیکل 10 اے فئیر ٹرائل کا حق دیتا ہے اور آرٹیکل 184/3میں نظر ثانی کا اختیار بڑا محدود ہے، فئیر ٹرائل کیلئے اپیل کا حق ضروری ہے۔
