لاہور ( این این آئی ) لاہور پولیس نے پاکستان تحریک انصاف کے چیئرمین عمران خان سمیت مرکزی قیادت شاہ محمود قریشی، مراد سعید، علی امین گنڈا پور، حماد اظہر اور دیگر کے خلاف قتل، ڈکیتی، پولیس پر حملے، سرکاری املاک کو نقصان سمیت دیگر الزامات کے تحت سات مقدمات درج کیے ہیں جن میں سے چار مقدمات انسداد دہشت گردی ایکٹ کے تحت درج کیے گئے ہیں۔پی ٹی آئی رہنمائوں کے خلاف لاہور کینٹ میں کور کمانڈر ہائوس (جناح ہائوس) پر حملہ کرنے، 15کروڑ روپے سے زائد مالیت کا قیمتی سامان لوٹنے اور اسے آگ لگانے کے لیے انسداد دہشت گردی ایکٹ اور 20دیگر جرائم کے تحت سرور روڈ تھانے میں مقدمہ درج کیا گیا ۔ان کے خلاف یہ مقدمہ ڈی ایس پی اشفاق رانا کی مدعیت میں درج کیا گیا ہے۔ ایف آئی آر میں پی ٹی آئی کے سربراہ عمران خان، شاہ محمود قریشی سمیت کئی دیگر سینئر رہنمائوں اور 1500 کارکنوں کو نامزد کیا گیا ہے۔ایف آئی آر میں الزام عائد کیا گیا ہے کہ پی ٹی آئی کے رہنما میاں اسلم اقبال اور محمود الرشید نے مسلح ہو کر مشتعل ہجوم کی قیادت کی جو بعد میں لاہور کینٹ کے علاقے کی طرف جاتے ہوئے پرتشدد ہو گئے۔ڈی ایس پی نے ایف آئی آر میں الزام لگایا کہ انہوں نے فوج کے خلاف نعرے بازی کی اور اعلان کیا کہ پی ٹی آئی کی اعلی قیادت نے انہیں پولیس پر حملہ کرنے اور سرکاری و نجی املاک نذر آتش کرنے کی ہدایت کی ہے۔
