لاہور( این این آئی)وفاقی وزیر اطلاعات و نشریات مریم اورنگزیب نے کہا ہے کہ پاکستان محفوظ ہاتھوں میں ہے، عمران خان نے ملکی ساکھ دا ئوپر لگائی، ہمیں تباہ حال معیشت ورثہ میں ملی، عمران خان نے معیشت کے ساتھ جو کھلواڑ کیا اس کی مثال نہیں ملتی، عمران خان کی گرفتاری سے حکومت کا کوئی تعلق نہیں، قومی احتساب بیورو نے القادر ٹرسٹ کرپشن کیس میں عمران خان کو گرفتار کیا، پاکستان کی تاریخ میں کبھی ایسا نہیں ہوا کہ جسمانی ریمانڈ پر موجود ملزم کو اتنا بڑا ریلیف ملا ہو،اسلام آباد ہائیکورٹ نے عمران خان کو تمام مقدمات میں ایک ساتھ ضمانتیں دیں۔عالمی نشریاتی ادارے الجزیرہ کو انٹرویومیں مریم اورنگزیب نے کہا کہ عمران خان سے جب بھی پوچھ گچھ یا تفتیش کی جائے تو وہ تشدد پر اتر آتے ہیں، پی ٹی آئی کی پوری قیادت لوگوں کو تشدد پر اکساتی رہی اور توڑ پھوڑ، جلا ئوگھرا ئوکی نگرانی کرتی رہی، عمران خان اپنے خلاف کسی کیس میں جواب دینے کے لئے تیار نہیں،حکومت نے دانشمندی اور تحمل کا مظاہرہ کیا،ہمارا مقصد سیاسی انتقام لینا ہوتا تو ہم 14 ماہ انتظار نہ کرتے۔ انہوں نے کہا کہ سائفر کے معاملے پر ہم چاہتے تو عمران خان جیل کی سلاخوں کے پیچھے ہوتے، عمران خان چاہتے ہیں کہ انتخابات ان کی مرضی کے وقت ہوں، انتخابات اس وقت ہوں گے جب ہم اپنی آئینی مدت پوری کرلیں گے۔
