لاہور( این این آئی) سینئر اداکا ر فیصل قریشی نے کہا ہے کہ اداکاری میں قسمت آزمائی کیلئے لاہور اور کراچی اہمیت کے حامل شہر ہیں ۔ ایک انٹر ویو میں انہوں نے کہا کہ بہت سے فنکار ایسے ہیں جنہوں نے دوسروں شہروں سے لاہور اور کراچی کا رخ کیا اور پھر خدا کی ذات نے انہیں بے پناہ شہرت دی ۔ شوبز کے علاوہ بھی دیگر شعبوں کے لوگ ان شہروں میں قیام کرنے کو ترجیح دیتے ہیں ۔انہوں نے کہا کہ میں لاہور میں بھی ٹی وی ڈراموں میں کام کرتا رہا ہوں اور میرا ڈرامہ ”ٹوبہ ٹیک سنگھ ”بہت مشہور ہوا۔اس کے بعد میں کراچی منتقل ہوگیا جہاں مجھے حقیقی کامیابی ملی اور پھر میں نے پیچھے مڑ کر نہیں دیکھا ۔میں خدا کی ذات کا شکر ادا کرتا ہوں جس نے مجھے ا تنی عزت اور مقام سے نوازا ہے ۔ انہوںنے کہا کہ کیرئیر کے آغاز میں جن لوگوں نے میری رہنمائی کی میں ان کا تاحیات شکر گزار رہوں گا۔
