کراچی(این این آئی)جبران ناصرکی اہلیہ منشا پاشا نے شوہر کے مبینہ اغوا پر اندراج مقدمہ کی درخواست جمع کرادی۔پولیس کے مطابق جبران ناصر کی اہلیہ منشاپاشا نے درخواست کلفٹن تھانے میں جمع کرائی ہے۔منشا پاشا نے درخواست میں مؤقف اختیار کیا کہ ڈیفنس فیز 5 کے قریب سے گزرتے ہوئے ہماری گاڑی سفید ڈبل کیبن سے ٹکرائی، سلور رنگ کی دوسری گاڑی نے ہماری گاڑی کا آگے سے راستہ روکا۔درخواست گزار کے مطابق دونوں گاڑیوں میں تقریبا 15 مسلح افراد تھے، میرے شوہر کو مسلح افراد نے زبردستی گاڑی سے اتارا اور ساتھ لے گئے۔درخواست میں منشا پاشا نے کہا کہ پولیس میری درخواست پرمقدمہ درج نہیں کررہی جس کیلئے عدالت سے رجوع کروں گی۔دوسری جانب ایس ایس پی ساؤتھ اسد رضا نے بتایا کہ جبران ناصر سے متعلق درخواست موصول ہوئی ہے، کلفٹن تھانے میں اغوا کی دفعہ کے تحت منشا پاشا کی مدعیت میں مقدمہ درج کیا جا رہا ہے۔
