اسلام آباد(این این آئی) وفاقی وزیرخزانہ اسحق ڈار نے اعلان کیا ہے کہ اگلے مالی سال میں 50 ہزار زرعی ٹیوب ویلز کو شمسی توانائی پر منتقل کیا جائے گا۔ جمعہ کو قومی اسمبلی میں خطاب کرتے ہوئے وزیر خزانہ محمد اسحاق ڈار نے کہا کہ زراعت کا شعبہ ملکی معیشت میں ریڑھ کی ہڈی کی حیثیت رکھتا ہے، اگلے مالی سال میں اس شعبے کیلئے مندرجہ ذیل اقدامات کرنے کی تجاویز ہیں،زرعی قرضوں کی حد کو رواں مالی سال میں 1800 ارب سے بڑھا کر 2250 ارب روپے کر دیا گیا ہے۔انہوںنے کہاکہ بجلی/ڈیزل کے بل کسان کے سب سے بڑے اخراجات میں شامل ہیں، اگلے مالی سال میں 50 ہزار زرعی ٹیوب ویلز کو شمسی توانائی پر منتقل کرنے کیلئے 30 ارب روپے مختص کئے گئے ہیں۔انہوںنے کہاکہ معیاری بیج ہی اچھی فصل کی بنیاد ہیں، ملک میں معیاری بیجوں کے استعمال کو فروغ دینے کیلئے ان کی درآمد پر تمام ٹیکسز اور ڈیوٹیز ختم کی جا رہی ہیں، اسی طرح Sapplings کی درآمد پر کسٹم ڈیوٹی ختم کی جا رہی ہے۔انہوںنے کہاکہ موسمی تبدیلی کی وجہ سے Harvesting کی مدت کم سے کم ہوتی جا رہی ہے، اس کے ساتھ ساتھ اگر کسان نے تیسری فصل بھی اٹھانی ہے اس کیلئے ضروری ہے کہ پکی ہوئی فصل کو جلد سے جلد سنبھالا جائے۔ اس کیلئے Combine Harvesters کی ضرورت ہے۔ Combine Harvesters کے استعمال کو فروغ دینے کیلئے یہ تجویز ہے کہ ان پر تمام ڈیوٹی و ٹیکسز سے استثنی دیا جائے۔انہوں نے کہاکہ چاول کی پیداوار بڑھانے کیلئے Rice Planters, Seeder اور Dryers کو بھی ڈیوٹی و ٹیکسز سے استثنیٰ کی تجویز ہے۔
