لاہور( این این آئی) سابق وزیر داخلہ شیخ رشید احمد نے کہا ہے کہ پاکستان کو سویڈن سے اپنا سفیر احتجاجاً واپس بلا لینا چاہیے ،آنے والے 45 دن پاکستان کی معاشی سلامتی اورسیاسی مستقبل کے لیے اہم ہیں ،دنیا کی نظریں پاکستان پر ہیں کیونکہ پاکستان خطے کا اہم ملک ہے ،سیاسی استحکام ہوگا تو معاشی استحکام ہوگا ،سیاسی استحکام معاشی اور اقتصادی مالی استحکام کی بنیاد بنے گا، 13 جماعتیں نہیں پاکستان کے 25 کروڑ لوگ ہی پاکستان کی بقا ء اور اس کے ضامن ہیں ،دبئی میں ایک ہفتہ بڑھائیں یا دو ہفتے بڑھائیں ان کی الٹی گنتی شروع ہو چکی ہے ۔ ٹوئٹر پر جاری اپنے بیان میں انہوں نے کہا کہ 13 اگست تک حکومت کا کٹی کٹا نکل آئے گا ،ایک جاپان ہی رہ گیا تھا وہ بھی وزیر خارجہ نے پورا کر لیا ہے ،اور سیز پاکستانیوں سے خطاب کے بجائے ان کو ووٹ دینے کا حق دیا جائے ،پاکستان کے حقیقی مالک ا س کے عوام ہیں، یہ مسترد شدہ سیاست دانوں کی جاگیر نہیں ،حکمران صرف نیب ترمیم کے ذریعے اپنے کیس ختم کروانے آئے تھے وہ کرا وا لیے ہیں لیکن عوام کو مہنگائی کے جہنم میں ڈال دیا ہے ،415 ارب روپے کے نئے ٹیکس عوام کی گردن میں ڈال دئیے گئے ہیں ،آئی ایم ایف کا ابھی زبانی اعلان آیا ہے ،12 جولائی کو تحریری اعلان آئے گا 12 جولائی سے عوام کے لیے بجلی گیس اور اجناس مزید مہنگے ہو جائیں گے ،تنخوادار طبقہ مزید پس کر رہ گیا ہے ،ابھی تک پیپلزپارٹی کی طرف سے آئی ایم ایف کے معاہدے پر کوئی ردعمل نہیں آیا جس کا مطلب ہے ابھی دال میں کچھ کالا ہے ،ہارس ٹریڈنگ کرکے خریدو فروخت کی منڈی لگا کے چور دروازے سے آنے والے عوام کے غیض و غضب کے لیے تیار ہوجائیں ۔ انہوں نے کہا کہ سویڈن میں قرآن پاک کی بے حرمتی پر پاکستان کو اپنا سفیر واپس بلا لینا چاہیے۔
