ممبئی (این این آئی)نئی آنے والی بالی وڈ فلم” جی لے ذرا ”سے پریانکا چوپڑا اورکترینہ کیف کے انکار کے بعد کیارا ایڈوانی اورانوشکا شرما سے بات چیت کی جارہی ہے۔بالی وڈ کی کامیاب ترین اداکاروں کو ایک ساتھ دیکھنے کا خواب ، خواب ہی رہ گیا۔ رواں برس مارچ میں فرحان اختر نے اپنی آنے والی فلم جی لے ذرا کے حوالے سے آگاہ کیا کہ فلم کی لوکیشن کی تلاش کی جارہی ہے۔ جس کی وجہ سے فلمی شائقین یہ امید کر رہے تھے کہ اس فلم کی عکس بندی جلد کر لی جائے گی۔ تاہم ابھی اس فلم کو مشکلات کا سامنا ہے ۔ فلم کی مرکزی کاسٹ میں شامل پریانکا چوپڑا اور کترینہ کیف نے اس فلم میں کام کرنے سے انکار کردیا ہے۔ پریانکا نے اس فلم میں کام نہ کرنے کی وجہ اپنے نئے پراجیکٹ بتائی کیونکہ وہ ہالی وڈ ایکشن تھرلر فلم کی شوٹنگ میں مصروف ہونگی۔ اس اعلان کے بعد کترینہ کیف بھی اس فلم سے باہر نکل گئیں ہیں۔ کترینہ کیف اور پریانکا چوپڑا کے اس فلم سے نکل جانے کے بعد ان کرداروں کے لیے کیارا ایڈوانی اور انوشکا شرما سے رابطہ کیا جا رہا ہے۔ تاہم جی لے ذرا میں عالیہ بھٹ ابھی بھی فلم کی کاسٹ میں شامل ہیں۔ اب عالیہ کے ساتھ کترینہ اور پریانکا کے کردار کونسی اداکارہ ادا کریں گی ۔ اس کے حوالے سے کچھ دن میں معلوم ہوجائے گا۔ جی لے ذرا کی ہدایت فرحان اختر دے رہے ہیں۔
