سرگودھا(این این آئی)وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ ملتان کی جلسی کے بعد جاتی امراء کی راج کماری اور کنیزوں کی نیندیں حرام ہو چکی ہیں۔راج کماری اور کنیزیں خود فریبی اور خوف کا شکار ہیں لاڈلا شہزادہ بھی اب چین کی بانسری بجا رہا ہے۔ڈاکٹر فردوس عاشق اعوان نے جمعرات کے روز اپنے بیان میں کہا کہ سیاسی تماشا لگانے والے بہت جلد خود تماشا بننے والے ہیں۔انہوں نے کہا کہ بین الاقوامی منی لانڈر اسحاق ڈار کا بی بی سی کو دیا گیا انٹرویو جھوٹ اور سچ کی خود گواہی دے رہا ہے۔اسحاق ڈار کے منہ سے ڈر کے مارے سچ نکلا اور ایک بار پھر ”شریف سیاست” کا پردہ چاک ہوا۔30 سال تک پاکستان کو بے دردی سے لوٹنے والے کسی صورت راہنما نہیں بلکہ راہزن ہیں۔ڈاکٹر فردوس عاشق اعوان نے کہا کہ22 کروڑ عوام راج کماری اور شہزادے کے خاندانوں کی لوٹ مار کبھی نہیں بھول سکتے۔
