ممبئی(این این آئی) بالی وڈ سپراسٹار عالیہ بھٹ اور رنویر سنگھ کی نئی فلم راکی اور رانی کی پریم کہانی نے اپنی ریلیز کے پہلے ہفتے ہی 100 کروڑ سے زائد کا بزنس کرلیا۔ بھارتی میڈیا کے مطابق نئی رومینٹک کامیڈی ڈراما فلم نے اپنی ریلیز کے ساتویں دن انڈین باکس آفس پر 6.25کروڑ کا بزنس کیا اور مقامی باکس آفس پر اس کا مجموعی بزنس 73کروڑ تک پہنچ گیا ہے۔ذرائع کے مطابق فلم مقامی اور عالمی باکس آفس پر ایک کامیابی حاصل کررہی ہے اور پوری دنیا میں اس نے 100کروڑ کا ہندسہ عبور کرلیا ہے۔راکی اور رانی کی پریم کہانی عالیہ بھٹ اور رنویر سنگھ کی محبت کہانی پر مشتمل ہے جن کو اپنے خوابوں کی تکمیل کیلئے رکاوٹوں کا سامنا کرنا پڑتا ہے۔رومینٹک ڈراما فلم کو نامور فلمساز کرن جوہر نے ہدایت کاری دی ہے اور وہ اس فلم کے ساتھ سات برس کے وقفے کے بعد ہدایت کاری کے میدان میں واپس آئے ہیں۔نئی فلم میں بالی وڈ کے سینئر اداکار دھرمیندر، شبانہ اعظمی،جیا بچن بھی شامل ہیں۔
