واشنگٹن(این این آئی)امریکی صدر جو بائیڈن کی انتظامیہ پر ریپبلکن اور ڈیموکریٹک دونوں کی تنقید کے جلو میں ایران کے ساتھ منجمد فنڈز پر پابندی ہٹانے کے بدلے میں 5 امریکیوں کو رہا کرنے کے معاہدے کے بعد تہران نے تصدیق کی ہے کہ اس نے اپنے فنڈز کی بازیابی کے لیے امریکی ضمانتوں کی درخواست کی ہے۔غیرملکی خبررساں ادارے کے مطابق ایرانی وزارت خارجہ کے ترجمان ناصر کنعانی نے کہا کہ ان کا ملک امریکا کے ساتھ وہاں زیر حراست ایرانیوں کی رہائی اور منجمد اثاثوں کی بازیابی کے حوالے سے مفاہمت پر پہنچ گیا ہے۔انہوں نے مزید کہا کہ تہران امریکیوں کے ساتھ واشنگٹن میں زیر حراست ایرانیوں کی رہائی اور ایک مقررہ مدت کے اندر منجمد اثاثوں کی واگزاری کے حوالے سے ایک مفاہمت پر پہنچ گیا ہے۔انہوں نے بیان جاری رکھتے ہوئے مزید کہا کہ ہم نے امریکا سے کافی ضمانتیں حاصل کر لی ہیں اور ہم امید کرتے ہیں کہ اس عرصے کے دوران کچھ منجمد اثاثے جاری کر دیے جائیں گے۔ تاہم انھوں نے یہ نہیں بتایا کہ فنڈز کی فراہمی کب ہوگی۔
