اسلام آباد(این این آئی) پاکستان پیپلزپارٹی کی نائب صدر سینیٹر شیری رحمان نے الیکشن کمیشن سے مقررہ وقت پر انتخابات کرانے کا مطالبہ کر تے ہوئے کہا ہے کہ الیکشن کمیشن کے حالیہ اعلان سے ظاہر ہوتا ہے کہ نئی مردم شماری کے مطابق حلقہ بندیوں میں چار ماہ لگیں گے،یہ اعلان پیپلزپارٹی کیلئے تشویش اور مایوسی کا باعث ہے، الیکشن کمیشن اپنے فیصلے اور جاری کردہ شیڈول پر سنجیدنگی سے نظر ثانی کرے۔ اپنے بیان میں پیپلز پارٹی کی نائب صدر سینیٹر شیری رحمان نے الیکشن کمیشن سے مقرر وقت پر انتخابات کرانے کا مطالبہ کردیا اور کہاکہ الیکشن کمیشن کے حالیہ اعلان سے ظاہر ہوتا ہے نئی حلقہ بندیوں میں چار ماہ لگیں گے۔ انہوںنے کہاکہ الیکشن کمیشن کا یہ اعلان ہمارے لئے تشویش اور مایوسی کا باعث ہے، الیکشن کمیشن اپنے فیصلے اور جاری کردہ شیڈول پر سنجیدنگی سے نظر ثانی کرے۔ شیری رحمن نے کہاکہ اسمبلیوں کی جلد تحلیل کرنے کا مقصد انتخابی تیاریوں کیلئے زیادہ سے زیادہ وقت فراہم کرنا تھا۔ شیری رحمن نے کہاکہ پیپلز پارٹی نے سی سی آئی اجلاس میں نئی مردم شماری کے تحت انتخابات کی توثیق کی تھی، اجلاس میں اس بات پر اتفاق کیا گیا تھا کہ موجودہ نشستیں تبدیلی نہیں ہونگی۔ شیری رحمن نے کہاکہ پیپلز پارٹی اور ووٹرز عام انتخابات کی تاریخ کے منتظر تھے، حلقہ بندیوں کے شیڈول کے نہیں، انتخابات میں کسی قسم کی تاخیر ملک میں سیاسی غیر یقینی اور عدم استحکام کا باعث بنے گی۔ انہوںنے کہاکہ آئین الیکشن کمیشن کو اسمبلی تحلیل ہونے کے 90 دنوں میں انتخابات کا پابند کرتا ہے ، الیکشن کمیشن آرٹیکل 224 کے مطابق انتخابات کی تاریخ کا اعلان کرے۔
