اسلام کوٹ ، تھر بلاک ون منصوبے کے تحت کرکٹ اسٹیڈیم کی تزئین و آرائش مکمل

اسلام آ باد(این این آئی)تھر بلاک ون انٹیگریٹڈ انرجی پراجیکٹ نے اسلام کوٹ تھر میں ماروی کرکٹ اسٹیڈیم کی تزئین و آرائش کا کام مکمل کر لیا ہے، اسٹیڈیم کی تزئین و آرائش200000 ڈالر کی لاگت سے تین ماہ میں مکمل کی گئی۔ گوادر پرو کے مطابق سینو سندھ ریسورسز لمیٹڈ (ایس ایس آر ایل ) نے اعلان کیا ہے کہ تزئین و آرائش کے بعد اسٹیڈیم عوام کے لیے کھلا ہے، یوم آزادی کی مناسبت سے اسلام کوٹ اور تھر بلاک ون پراجیکٹ کی کرکٹ ٹیموں کے درمیان نمائشی میچ کا انعقاد کیا گیا۔ میچ اور جشن آزادی کی تقریب نے سیکڑوں مقامی شائقین کو اپنی طرف متوجہ کیا اور متعدد معززین نے شرکت کی۔گوادر پرو کے مطابق چیئرمین مینگ ڈونگہائی کی قیادت میں ایس ایس آر ایل اور ٹی سی بی ون انتظامیہ کے اعلی عہدیداروں نے افتتاحی تقریب میں شرکت کی۔ تھر بلاک 1 انٹیگریٹڈ انرجی پروجیکٹ شنگھائی الیکٹرک کی جانب سے اپنے ماتحت اداروں ایس ایس آر ایل اور ٹی سی بی ون کے ذریعے مکمل کیا گیا ہے۔گوادر پرو کے مطابق ڈونگہائی نے کہا کہ کرکٹ بلاشبہ پاکستان کا مقبول ترین کھیل ہے۔ ہم اس علاقے کے نوجوان ٹیلنٹ کو اپنی صلاحیتوں کو نکھارنے کا موقع فراہم کرنا چاہتے ہیں۔ تعلقہ اسلام کوٹ میں ٹان کمیٹی کے چیئرمین کملیش کمار نے تھر بلاک ون منصوبے کی مقامی برادری کے لیے قابل ستائش خدمات کو سراہا۔