راولپنڈی (این این آئی)ایڈیشنل سیشن جج راولپنڈی سید محمد اعجاز نے مسز انجم قریشی اور ان کے شوہر غفران احمد قریشی کی درخواست پر ان کا بینک لاکر توڑنے کے معاملے کی مکمل تحقیقات کا حکم دیدیا ہے۔ عدالت سے جاری ہونے والے حکم میں کہاگیا کہ مدعی مسز انجم قریشی کے مطابق انہوںنے اپنی بیٹی کے ساتھ حبیب بینک میں مشترکہ اکائونٹ کھول رکھا ہے اور لاکر حاصل کیا جس میں بارہ تولے سونا موجود تھا مگر ان کا لاکر توڑ دیا گیا ہے اور مقدمہ بھی درج نہیں کیا جارہاہے۔ عدالت نے مکمل سماعت کے بعد جاری ہونے والے حکم میں کہا کہ حکام کے مطابق انہوںنے واجبات ادا نہ کرنے کی وجہ سے مدعی کو نوٹس دیا تھا جس کے بعدایک ٹیم کی موجودگی میں لاکر توڑا گیااس میں کچھ نہیں تھا۔ عدالت نے اپنے حکم میں کہاکہ ایف آئی اے حکام کے پاس یہ معاملہ تحقیقات کیلئے موجود ہے تاہم انہوںنے انکوائری نہیں کی متعلقہ تفتیشی افسر ایف آئی اے کی سب انسپکٹر افشاں نورین پر لازم ہے کہ وہ لاکر توڑ نے کے موقع پر موجود تمام افراد سے تحقیقات کریں لیکن اس نے نہیں کیں اور مدعی کی درخواست پر بھی کوئی جواب نہیں دیا گیا جو غیر قانونی ہے۔حکم کے مطابق افشاں نورین کو ہدایت کی جاتی ہے کہ وہ کیس کے حقائق کی تحقیقات کرے اور تمام لوگوں کو اس میں شامل کیا جائے۔
