کراچی(این این آئی)پاکستان پیپلز پارٹی کے سینئررہنما خورشیداحمد شاہ نے کہاہے کہ میاں صاحب آپ آئیں اور جیل جائیں آپ ہیرو بن جائیں گے، گارنٹی دیتا ہوں کہ شہبازشریف ان کی سیٹ پر قبضہ نہیں کریں گے،میاں صاحب ہم برے وقت میں آپ کیساتھ رہے ہیں، آئیں الیکشن کرائیں پارلیمنٹ میں آئیں، خدا کے واسطے میاں صاحب آپ کو ہوش آنا چاہیے، کیوں الیکشن میں تاخیر چاہتے ہیں۔خصوصی گفتگو کرتے ہوئے خورشیدشاہ نے کہا کہ آئین ہمیں الیکشن میں تاخیرکی کوئی گنجائش نہیں دیتا، پہلے بھی آئین کی خلاف ورزی اب بھی آئین کی خلاف ورزی کی جارہی ہے، الیکشن میں تاخیرکریں گے توآئین کی خلاف ورزی ہوگی جودرست نہیں۔انتخابات کے حوالے سے انہوں نے کہاکہ ہرموسم میں،تمام قسم کے حالات میں الیکشن ہوئے اب کیامسئلہ ہے، آئین کی پاسداری رکھنی ہے تو پرانی حلقہ بندیوں پرہی الیکشن کرالیتے۔پی پی رہنما نے کہا کہ جنوری کے آخری ہفتے میں بھی الیکشن نہ ہوئے تو آگے بلیک کوریڈور ہے، ہم حکومت نہیں چاہتے، ہم پاکستان،جمہوریت اورپارلیمنٹ چاہتے ہیں، دوسری جماعتوں کو الیکشن سے خوف ہے لیکن پیپلزپارٹی پوری طرح تیار ہے۔انہوں نے کہاکہ جمہوریت کیلئے پاکستان پیپلزپارٹی نے قربانیاں دی ہیں ، جلاوطنی سے جمہوریت کیلئے واپس آرہے ہیں توآئیں الیکشن کرائیں، خدا کے واسطے جمہوری اور سیاستدان بنیں، الیکشن کراکرپارلیمنٹ بحال کریں۔ن لیگ سے متعلق خورشید شاہ نے کہا کہ کہا تھا کہ آخر میں یہ لوگ کہیں گے ہمارافیصلہ اللہ کریگااورانہوں نے کہہ بھی دیا۔خورشیدشاہ نے نواز شریف کو مخاطب کرتے ہوئے کہا کہ میاں صاحب ہم برے وقت میں آپ کیساتھ رہے ہیں، پوچھناچاہتاہوں کس بات کا خوف ہے، آئیں الیکشن کرائیں پارلیمنٹ میں آئیں، خدا کے واسطے میاں صاحب آپ کو ہوش آنا چاہیے، کیوں الیکشن میں تاخیر چاہتے ہیں۔انہوں نے کہاکہ نواز شریف کوقانون کے مطابق چلنا چاہیے، قانون میں اپیل کا حق ہے تو نوازشریف کو بھی اپیل کاحق ملے گا، ماورائے قانون کچھ کام ہوگا تو کل اور لوگ بھی ایسے ہی فائدے چاہیں گے۔خورشید شاہ نے کہا کہ میاں صاحب گھبرائیں نہیں،حکومت بنانے کیلئے ووٹ نہیں تو پی پی سپورٹ کرے گی ، میاں صاحب حکومت کرنے کیلئے ہی آنا چاہتے ہیں تو پھر دیدیں گے لیکن الیکشن تو کرائیں۔پی پی رہنما نے نواز شریف سے کہا کہ جیل جائیں گے ہیرو بن جائیں گے، میاں صاحب جیل سے بچنے کے چکرمیں زیرو نہ بنیں۔انہوں نے کہاکہ ن لیگ کو کامیابی نظر نہیں آرہی تو بھی الیکشن میں تاخیرکی غلطی نہ کریں، آئین موجود ہوتا ہے تو ہر عوامی پارٹی کو پارلیمنٹ جانے کا موقع ملتاہے، جمہوریت ہوتی ہے تو ہر پارٹی کواقتدار کا موقع ملتا ہے۔نواز شریف کی ضمانت کے حوالے سے خورشید شاہ نے کہا کہ ناجائز ہی صحیح لیکن نوازشریف ایک مجرم ہیں، بیشک عدالت نے نواز شریف کوغلط سزادی ہوگی لیکن وہ مجرم ہیں اور عدالت ایک مجرم کو کیسے ضمانت دیگی۔
