اسلام آباد (این این آئی)دین دشمن ہماری نوجوان نسل کو شکوک و شبہات میں مبتلا کرنا چاہتے ہیں۔ یہ بات وزیر مذہبی امور انیق احمد نے گذشتہ روز راولپنڈی میں صفہ سویٹ ہوم کے زیر اہتمام طلبا کے تقریری مقابلوں اور سیرت سیمینار سے خطاب کے دوران کہی۔ انیق احمد نے کہا کہ دین دشمن ہماری نوجوان نسل کو شکوک و شبہات میں مبتلا کرنا چاہتے ہیں۔ نوجوان نسل کو جدید دور کے مسائل سے نبرد آزما ہونے کیلئے علم و حکمت سے مدد لینا ہو گی۔ ہمیں چاہیے کہ اللہ اور اسکے نبی ۖ سے تعلق پیدا کریں۔ نبی کریمۖ کی حیات مبارکہ کے تین مرحلے تلاش حق، اعلان حق اور نفاذ حق ہیں،اقبال کی شاعری قرآن کریم کی آیات کی تفسیر ہے اور ان کا مخاطب نوجوان ہیں۔ انہوںنے کہاکہ قرآن کریم زمین والوں سے اللہ کا آخری کلام ہے،انسانیت کے تمام مسائل کا حل دین کے پاس موجود ہے، مسلمان سوشل ورکر کے ساتھ ساتھ ایک لیڈر بھی ہوتا ہے۔ انہوںنے کہاکہ آج ہمارے درمیان امت کا تصور نظر نہیں آتا، مسلمان انسانیت کا 25 فیصد ہیں، دنیا ہم سے صرفِ نظر نہیں کر سکتی۔انہوںنے کہاکہ اگر ہم درست راستے پر چلتے تو غزہ، برما، کشمیر جیسے مسائل پیدا ہی نہیں ہوتے، علما کرام کو چاہیے کہ قوم کی رہنمائی کریں اور قوم کو مایوسی سے نکالیں۔ انہوںنے کہاکہ مایوس صرف ابلیس ہو تا ہے، ہمیں اللہ کی رحمت سے کبھی مایوس نہیں ہونا چاہیے۔ انہوںنے کہاکہ ہمارا آنے والا دن روشن اور تابناک ہے۔ سیمینار سے سابق وزیر مذہبی امور سینیٹر طلحہ محمود، مفتی زبیر و دیگر علما اور سکالرز نے خطاب کیا۔ تقریری مقابلوں میں نمایاں پوزیشن لینے والے طلبا میں نقد انعامات تقسیم کیے۔ سیمینار کے شرکاء نے غاصب اسرائیل کی غزہ میں جاری مسلمانوں کی نسل کشی کی شدید الفاظ میں مذمتی قراردار منظور کی۔
