اسلام آباد(این این آئی)چیئرمین سینیٹ صادق سنجرانی نے موٹروے ایم ون سیکشن سے اسلام آباد انٹرنیشنل ایئرپورٹ تک راستے کی عدم دستیابی سے متعلق رپورٹ طلب کر لی جبکہ نگران وفاقی وزیر اطلاعات و نشریات مرتضی سولنگی نے کہا کہ ممکن ہوا تو نگران حکومت کی مدت میں ہی اس پر کام شروع کرا دیا جائے گا۔ منگل کو اجلاس میں سینیٹر محسن عزیز نے پنجاب اور خیبرپختونخوا سے آنے والے مسافروں کے لئے موٹروے ایم ون سیکشن سے اسلام آباد انٹرنیشنل ایئرپورٹ کی طرف راستے کی عدم دستیابی سے لوگوں کو درپیش مسائل کے حوالے سے توجہ دلائو نوٹس پیش کیا جس پر نگران وفاقی وزیر اطلاعات و نشریات مرتضی سولنگی نے کہا کہ سینیٹر محسن نے جو معاملہ اٹھایا ہے اور جو تجویز انہوں نے پیش کی ہے وہ بہت مناسب ہے، خیبرپختونخوا سے آنے والے لوگوں کی تکلیف کا مداوا ہونا چاہیے، یہ معاملہ آج ہی متعلقہ وزارت کے نوٹس میں لایا جائے گا اور اگر ممکن ہوا تو موجودہ نگران حکومت کی مدت میں ہی یہ منصوبہ شروع کیا جائے گا۔ چیئرمین سینیٹ صادق سنجرانی نے ہدایت کی کہ نیشنل ہائی وے اتھارٹی اور منصوبہ بندی ڈویژن اس حوالے سے منصوبہ تیار کریں اور حکومت اس کے لئے فنڈز فراہم کرے۔
