لاہور ( این این آئی) دہشت گردی کے خدشات کے پیش نظر کائونٹر ٹیررازم ڈیپارٹمنٹ (سی ٹی ڈی ) نے پنجاب کے مختلف شہروں میں 248 انٹیلی جنس بیسڈ آپریشنز کے دوران 7 دہشت گردوں کو گرفتار کر لیا ۔ترجمان سی ٹی ڈی کے مطابق کارروائیاں راولپنڈی، سرگودھا ، بہالپور، پاکپتن اور ساہیوال میں کی گئیں ۔بہالپور سے ٹی ٹی پی کے اہم کمانڈر سلمان کو گرفتار کیا گیا جبکہ دیگر دہشت گردوں کی شناخت موسیٰ، خالد، سلمان، ندیم، اکمل اور یاسر یاسین کے نام سے ہوئی ۔ حکام کے مطابق دہشت گرد اہم تنصیبات پر حملے کی منصوبہ بندی کر رے تھے جن کے قبضے سے بارودی مواد،2 ہینڈ گرینڈ، 2ای ڈی بم اور نقدی برآمد کی گئی ۔ سی ٹی ڈی حکام نے کہا کہ رواں ہفتے 1136 کومبنگ آپریشنز کے دوران 132 مشتبہ افراد گرفتار کیے ، کومبنگ آپریشنز میں 46467افراد سے پوچھ گچھ کی گئی ۔سی ٹی ڈی محفوظ پنجاب کے ہدف پر عمل پیرا ہے ، دہشت گردی کے ناسور کو جڑ سے اکھاڑ پھینکنے کے لیے پرعزم ہیں ۔
