اسلام آباد (این این آئی)پاکستان مسلم لیگ (ن) کی سینیٹر سعدیہ عباسی نے نگران وزیراعظم انوار الحق کاکٹر کی جانب سے بلوچ مظاہرین سے متعلق ادا کیے گئے الفاظ کی مذمت کرتے ہوئے کہاہے کہ الفاظ عوامی حقوق کی توہین ہیں۔سینیٹ اجلاس کے دوران اظہار خیال کرتے ہوئے انہوں نے کہا کہ گزشتہ روز جو نگران وزیراعظم نے کہا کہ جو احتجاج کر رہے ہیں وہ ملک دشمن لوگ ہیں اور کہا جو ہمدردی کر رہے ہیں وہ جائیں اور ان کالعدم تنظیموں (بینڈ) تنظیموں کو جوائن کریں۔انہوںنے کہاکہ افسوسناک بات ہے کہ محدود مینڈیٹ ہے اور اس طرح کی باتیں۔مسلم لیگ (ن) کی سینیٹر نے کہا کہ اگر وہ ملک دشمن ہیں تو ان پر کیس کیوں نہیں بنا، ان کو عدالت میں پیش کیوں نہیں کیا۔انہوں نے کہا کہ اس ایوان کی توہین ہے کہ گزشتہ روز ایوان میں بات ہوئی اور ان کے بارے میں یہ کہنا کہ بینڈ آرگنائزیشن جوائن کریں، نگران وزیراعظم نے جو کہا وہ لوگوں کے حقوق کی توہین ہے۔سینیٹر سعدیہ عباسی نے کہا کہ اس طرح کی باتیں کرکے، نفرت کو بڑھا کر ملک کے مسائل حل نہیں ہوں گے۔انہوں نے کہا کہ میں نگران وزیراعظم کی ان لفاظ کی سخت الفاظ میں مذمت کرتی ہوں، باقی اراکین کو بھی مذمت کرنی چاہیے۔
