اسلام آباد(این این آئی)پی پی پی رہنماو سینیٹر شیری رحمن نے کہا ہے کہ ہم نے کسی کے ساتھ زور زبردستی نہیں کی، ہم سے پی ڈی ایم نے نہیں ن لیگ نے رابطہ کیا۔سینیٹر شیری رحمن نے سپریم کورٹ کے باہرمیڈیا سے گفتگو کے دوران کہا کہ قوم کو استحکام اور بہتری کی طرف لے کر جائیں گے، سنی اتحاد کونسل آگے بڑھے سب الیکشن کمیشن کے ہاتھ میں ہے۔شیری رحمن نے کہا کہ ذوالفقارعلی بھٹو صدارتی ریفرنس، امید ہے عدالت خود اس داغ کو دھوئے گی، اس تاریخ کو درست کرے گی،ہم منتظر ہیں کہ اب انصاف پر شفافیت نظر آئے گی۔انہوں نے کہا کہ موسم سرد ہے لیکن سیاسی گرما گرمی ہے۔شیری رحمن نے صدر مملکت عارف علوی کی جانب سے اب تک قومی اسمبلی کا اجلاس نہ بلانے پر ردِ عمل کا اظہار کرتے ہوئے کہاکہ صدر عارف علوی کے عمل سے ان کی ساکھ پر زک پڑ رہی ہے، صدر عارف علوی آئین شکنی کیوں کرنا چاہتے ہیں؟۔شیری رحمن نے کہا کہ اجلاس طلبی مخصوص نشستوں پر فیصلے سے مشروط کرنا افسوسناک ہے، افسوس صدر نے آئینی ذمہ داری سے دستبرداری کی، صدر کے عہدے پر ضرب پڑ رہی ہے، صدر آئین شکنی کے کیوں مرتکب ہونا چاہتے ہیں۔
