پاکستان بلائنڈ کرکٹ ٹیم نے دنیا کو خصوصی افراد کی شاندار صلاحیتوں سے متعارف کروایا ہے، صدر مملکت

0
163

اسلام آباد (این این آئی)صدر مملکت ڈاکٹر عارف علوی نے کہا ہے کہ پاکستان بلائنڈ کرکٹ ٹیم نے دنیا کو خصوصی افراد کی شاندار صلاحیتوں سے متعارف کروایا ہے، اس کی بھرپور حوصلہ افزائی کی ضرورت ہے۔ ان خیالات کا اظہار انہوں نے پاکستان بلائنڈ کرکٹ ٹیم سے گفتگو کرتے ہوئے کیا جس نے پیر کو یہاں ایوان صدر میں ان سے ملاقات کی۔ ایوان صدر کے پریس ونگ کے مطابق صدر مملکت نے کہا کہ قومی بلائنڈ کرکٹ ٹیم نے بین الاقوامی سطح پر پاکستان کا نام روشن کیا ہے اور ٹورنامنٹس میں شرکت کر کے بینائی سے محروم کرکٹرز کی حوصلہ افزائی کی ہے۔ انہوں نے کہا کہ پاکستان بلائنڈ کرکٹ ٹیم نے دنیا کو خصوصی افراد کی شاندار صلاحیتوں سے متعارف کروایا، حالیہ برسوں میں پاکستان میں بلائنڈ کرکٹ نے خصوصی توجہ اور پہچان حاصل کی ہے۔ صدر مملکت نے کہا کہ پاکستان بلائنڈ کرکٹ کونسل کا ملک میں کرکٹ کے مقابلوں کے فروغ اور انعقاد کے لئے سرگرم ہوناخوش آئند ہے، بلائنڈ کرکٹ ٹیم کی بھرپور حوصلہ افزائی کی ضرورت ہے۔ انہوں نے کہا کہ بلائنڈ کرکٹ ٹیم کی جدوجہد اور کامیابیوں کو اجاگر کرنے کے لئے کرکٹرز کی متاثر کن کارکردگی کو سراہا جانا چاہئے۔ اس موقع پر ٹیم مینجمنٹ نے صدر مملکت کو ٹیم کی حالیہ کارکردگی کے بارے میں بریف کیا۔ پاکستان بلائنڈ کرکٹ ٹیم کے ارکان نے حوصلہ افزائی پر صدر مملکت اور خاتون اول کا شکریہ ادا کیا۔ ملاقات میں خاتون اول ثمینہ عارف علوی بھی موجود تھیں۔