گوادر(این این آئی)گوادر میں دو روز قبل ہونے والی بارش کے بعد سے اب تک معمولات زندگی تاحال متاثر ہیں ۔ ایک انٹرویومیں متاثر ین نے گوادر میں نکاسی آب کے ناقص نظام کے حوالے سے بتایا کہ بارش کا پانی گھروں تک آرہا ہے، شہر کی مرکزی شاہراہ پوری طرح ڈوب گئی، متعدد گھر تباہ ہوچکے ہیں اور سڑکوں اور گلی محلوں میں چلنا دشوار ہوگیا ہے ادھر نگران وزیر اطلاعات بلوچستان جان اچکزئی نے کہاکہ بارش سے متاثرہ گوادر اور جیونی میں ریسکیو آپریشن جاری ہے۔انہوں نے کہا کہ آرمی، نیوی اور پی ڈی ایم اے نکاسی آب کے سلسلے میں بھرپور تعاون کررہے ہیں، 2 سے 3 دن میں حالات پر قابو پا لیا جائے گا ، گوادرائیرپورٹ کو فلائٹ آپریشن کے لیے بحال کر دیا گیا ہے۔
