اسپیکر قومی اسمبلی کی یوم پاکستان کے موقع مسلح افواج کی جانب سے شاندار پریڈ کے انعقاد پر مبارک باد

اسلام آبا د(این این آئی)اسپیکر قومی اسمبلی سردار ایاز صادق نے یوم پاکستان پر مسلح افواج کو شاندار پریڈ کے انعقاد پر خراج تحسین پیش کرتے ہوئے کہا ہے کہ ہماری مسلح افواج بھرپور صلاحیتوں کی مالک ہے،پاکستانی فوج کا شمار دنیا کی بہترین افواج میں ہوتا ہے،پاکستان کی مسلح افواج غیر متزلزل جذبے کی حامل افواج ہے۔ہفتہ کو یہاں جاری بیان میں سپیکر سردار ایاز صادق نے کہا کہ ہمیں اپنی افواج کی بھرپور صلاحیتوں پر فخر ہے،مسلح افواج نے ہمیشہ اپنی صلاحیتوں کا لوہا منوایا ہے،ملک کی طرف جب بھی کسی دشمن نے میلی آنکھ سے دیکھا ہے ہماری افواج نے اس کا منہ توڑ جواب دیا ہے۔سردار ایاز صادق نے کہا کہ مسلح افواج نے پاکستان کے دفاع کو ناقابل تسخیر بنانے میں بے مثال قربانیاں دی ہیں،افواج پاکستان ہر مشکل گھڑی میں عوام کے شانہ بشانہ کھڑی رہتی ہے، زلزلے ہو یا طوفان پاک فوج ہمیشہ قوم کی مشکل میں سیسہ پلائی دیوار کی مانند کھڑی رہتی ہے۔سردار ایاز صادق نے کہا کہ افواج پاکستان اس وقت دہشتگردی جیسے ناسور سے نبرد آزما ہے،دہشتگردی کے خلاف جنگ میں پوری قوم افواج پاکستان کے شانہ بشانہ کھڑی ہے،دہشتگردی کے خلاف جنگ میں مسلح افواج کی قربانیوں کو ہمیشہ یاد رکھا جائے گا۔