اسلام آباد (این این آئی)جاپان اور پاکستان کے مابین گرانٹ ایڈ معاہدہ طے پا گیا جس کے مطابق جاپان انسداد کورونا کیلئے پاکستان کو 1.54 ارب روپے گرانٹ فراہم کریگا۔ وزارتِ اقتصادی امور کا اعلامیہ کے مطابق گرانٹ معاہدے کے تحت ہیلتھ سے متعلقہ سامان بالخصوص وینٹیلیٹرز اور آکسیجن سیلنڈر کی خریداری میں مدد ملے گی ، معاہدے پر دستخط کی تقریب وزارت اقتصادی امور میں منعقد ہوئی،تقریب میں جاپانی سفیر اور سیکریٹری اقتصادی امور نے شرکت کی ۔ سیکرٹری ای اے ڈی کے مطابق انسدادِ کورونا کیلئے مدد اور تعاون کیلئے جاپان کے شکر گزار ہیں، جاپان کی پولیو کی روک تھام کیلئے بھی مدد قابلِ ستائش ہے۔سیکریٹری اقتصادی امورنور احمد نے کہاکہ جاپان سے پمز اور حیدرآباد ہاسپٹل میں سہولیات کو بہتر بنانے کیلئے بھی مدد ملی، جاپانی سفیر نے کہاکہ پاکستان نے کورونا سے نمٹنے کیلئے بہترین حکمت عملی اختیار کی، امید ہے کہ کورونا کی دوسری لہر سے بھی پاکستان بہتر انداز سے نمٹے گا۔ سفیر نے کہاکہ جاپان پاکستان کی سماجی و معاشی ترقی میں تعاون جاری رکھے گا۔
