اسلام آباد (این این آئی)190ملین پانڈز کیس میں سابق وزیر اعظم عمران خان اور ان کی اہلیہ بشری بی بی کے وکلا نے نئے جج کی تعیناتی پر اعتراض واپس لے لیے۔احتساب عدالت کے نئے جج محمد علی وڑائچ نے عمران خان اور بشری بی بی کے خلاف 190 ملین پانڈز کیس کی سماعت اڈیالہ جیل راولپنڈی میں کی۔قومی احتساب بیورو (نیب)کے پراسیکیوٹر جنرل سردار مظفر عباسی، امجد پرویز اور عمران خان آئی کے وکلا ظہیر عباس چوہدری، عثمان گل و دیگر عدالت میں پیش ہوئے۔دوران سماعت عمران خان اور بشری بی بی بھی کمرہ عدالت میں موجود تھے۔اسلام آباد ہائی کورٹ کی جانب سے نئے جج کی تعیناتی کا نوٹیفکیشن جاری کیا گیا، نئے جج کی تعیناتی کا نوٹیفکیشن موصول ہونے کے بعد وکلا صفائی نے اعتراضات واپس لے لیے تاہم 190 ملین پانڈ ریفرنس میں کسی گواہ کا بیان ریکارڈ نہ ہوسکا۔بعد ازاں عدالت نے 190 ملین پانڈ ریفرنس کی سماعت 14 جون تک ملتوی کردی۔
