آکلینڈ (این این آئی) نیوزی لینڈ کے خلاف پہلے ٹی ٹوئنٹی میں شاداب خان قیادت کی ذمہ داری نبھائیں گے۔ذرائع کے مطابق لیگ اسپنر نے فٹنس مسائل سے نجات حاصل کرلی ہے، شاداب نے ٹریننگ سیشن میں بھرپور پریکٹس کی، انہوں نے بیٹنگ،بولنگ اور فیلڈنگ ڈرلز میں شرکت کرکے اپنی فٹنس کا ثبوت دیا۔ شاداب کے فٹ ہونے پر ٹیم انتظامیہ نے بھی سکھ کا سانس لیا ہے۔ہیڈکوچ مصباح الحق نے شاداب خان سے پہلے میچ کیلئے ممکنہ پلینگ الیون کے حوالے سے بھی ابتدائی مشاور ت کی۔ پی ایس ایل میچز میں اسلام آباد یونائیٹڈ کی قیادت کرنے کا تجربہ رکھنے والے شاداب خان پہلی بار قومی ٹیم کی جانب سے ٹاس کرنے کیلئے میدان میں اترٰیں گے۔بابر اعظم کے سیریز سے باہر ہونے پر کپتانی کے حوالے سے سوالیہ نشان لگا ہوا تھا،نیوزی لینڈ کے ساتھ پہلا ٹی ٹوئنٹی جمعے کو کھیلا جائے گا۔
