منسک (این این آئی )بیلاروس کی اپوزیشن نے یورپین پارلیمنٹ کا انسانی حقوق اور سوچ کی آزادی کا سب سے بڑا اعزاز سخاروف پرائز 2020 حاصل کرلیاہے۔غیرملکی خبررساں ادارے کے مطابق یہ اعزاز یورپین پارلیمنٹ کے صدر ڈیوڈ ساسولی نے برسلز میں منعقد ہونے والی ایک پروقار تقریب میں بیلاروس کی اپوزیشن کوآرڈینیشن کونسل کو دیا، جسے اپوزیشن کی بڑی جماعت اور بیلاروس کی سابق صدارتی امیدوار سویتلانا سیکانوسکایا نے وصول کیا۔اس موقع پر خطاب کرتے ہوئے پارلیمنٹ کے صدر ڈیوڈ ساسولی نے کہا کہ ساری دنیا جانتی ہے کہ آپ کے ملک(بیلاروس)میں کیا ہورہا ہے۔ ہم نے آپ کی اور بیلاروس کی خواتین کی ہمت دیکھی ہے۔ ہم نے آپ کی تکلیف اور ان کہے مظالم بھی دیکھے ہیں۔اس کے ساتھ ساتھ آپ کی جانب سے ایک جمہوری ملک میں جینے کا عزم اور اس کی آرزو نے ہم سب کو بہت متاثر کیا ہے، اس لیے یہ یورپین پارلیمنٹ کا فیصلہ ہے کہ اس سال کے سخاروف پرائز 2020 کے حقدار آپ لوگ ہیں۔
