آکلینڈ (این این آئی)نیوزی لینڈ کے خلاف پہلے ٹی ٹونٹی میچ کے لیے 15 رکنی قومی کرکٹ ٹیم کا اعلان کر دیا گیا۔ قومی ٹی ٹونٹی کرکٹ ٹیم کا اعلان کپتان شاداب خان نے کیا۔اسکواڈ میں کپتان شاداب خان، عبداللہ شفیق، حیدر علی، سرفراز احمد، محمد حفیظ اور فہیم اشرف شامل ہیں۔حارث رف، افتخار احمد، عماد وسیم، خوشدل شاہ اور محمد حسنین ٹیم میں شامل ہیں ۔شاہین شاہ آفریدی، حسین طلعت، وہاب ریاض اور محمد رضوان بھی ٹیم کا حصہ ہیں ۔شاداب خان نے کہاہے کہ کوویڈ 19 اور کنکشن کے قوانین کی وجہ سے ہمیں 17 رکنی اسکواڈ ساتھ رکھنے کی اجازت ہے۔انہوں نے کہاکہ موسی خان اور عثمان قادر 15 رکنی اسکواڈ میں تو نہیں مگر ضرورت پڑی تو استعمال کرسکتے ہیں۔انہوں نے کہاکہ پہلی مرتبہ پاکستان کی قیادت کرنا میرے لیے اعزاز کی بات ہے،بابر اعظم کی کمی ضرور محسوس ہوگی، بابراعظم کی عدم موجودگی نئے کھلاڑیوں کے لیے صلاحیتوں کے اظہار کا بہترین موقع ہے، بابراعظم کی طرح جارحانہ کپتانی کرنے کا عادی ہوں۔شاداب خان نے کہاکہ ایڈن پارک میں کھیلنے کا تجربہ ہے، یہاں بانڈریز چھوٹی ہیں، تماشائیوں کی موجودگی میں دوبارہ کھیلنے کے منتظر ہیں۔
