اسلام آباد (این این آئی)وزیر داخلہ شیخ رشید احمد نے کہا ہے کہ اگر سینیٹ میں سپریم کورٹ نے شو آف ہینڈز کے حق میں فیصلہ دے دیا تو کوئی یہ نہیں کہہ سکے گا کہ الیکشن میں دھاندلی ہوئی اور یہ ایک انقلابی فیصلہ ہو گا،شناختی کارڈ اور پاسپورٹ کی توہین نہیں ہونی چاہیے، اسلام آباد تھانوں میں ایف آئی آر ہو گی اور تھانوں میں عزت سے پیش آیا جائے گا،اسلام آباد میں فورنزک لیب بنائیں گے، بارہ کہو، ترنول سمیت اسلام آباد کے نواحی علاقوں میں بھی لیب بنائیں گے۔میڈیا سے گفتگو کرتے ہوئے انہوں نے کہا کہ اسلام آباد تھانوں میں ایف آئی آر ہو گی اور تھانوں میں عزت سے پیش آیا جائے گا۔انہوں نے صحافیوں سے یکجہتی کا اظہار کرتے ہوئے کہا کہ آپ سمجھیں کہ ایک صحافی کو وزیر داخلہ بنا دیا گیا ہے۔انہوں نے پولیس اہلکاروں کی تنخواہوں میں اضافے کا عندیہ بھی دیا اور کہا کہ ان پولیس اہلکاروں کی تنخواہیں کم ہیں لہٰذا اس میں اضافہ کیا جائے۔انہوں نے کہا کہ 800 کنال پر ہم ان کی رہائش کا بندوبست کرنا چاہتے ہیں، اسلام آباد سے 800 کنال نہ ملے تو بے شک کم ملے تاہم وزیر اعظم کے آنے سے پہلے پہلے اسی ہفتے میں بندوبست ہو جائے گا اور ہم ان کو پلاٹ دیں گے تاکہ یہ بہتر طور پر گزارہ کر سکیں۔انہوں نے کہاکہ پولیس پر بہت کم خرچ کیا جا رہا ہے، ان کی ضروریات ہیں اور اسلام آباد میں سیکڑوں دینی مدرسے بھی ہیں لہٰذا ہم چاہتے ہیں کہ اسے پاکستان کا سب سے محفوظ شہر قرار دیا جائے اور یہاں 30 فیصد جرائم میں کمی ہوئی ہے۔شیخ رشید نے یاد گارِ شہدا پر حاضری کے موقع پر اسلام آباد اور پاکستان کی پولیس کو سلام پیش کرتے ہوئے کہا کہ جب تک میں وزیر داخلہ ہوں، میری پوری کوشش ہو گی کہ اسلام آباد کی پولیس اور ان کی تنخواہوں اور تشخص کو بہتر بنایا جائے۔ انہوں نے کہاکہ سرینا، میریٹ اور مارگلہ کے علاوہ تمام چیک پوسٹ ختم کردی جائیں گی ،ان کے پاس چھ گاڑیاں ہیں تو جلد چھ آٹھ مزید گاڑیاں دلا دیں گے۔انہوں نے کہاکہ پولیس پر بہت کم خرچ کیا جا رہا ہے، ان کی ضروریات ہیں اور اسلام آباد میں سیکڑوں دینی مدرسے بھی ہیں لہٰذا ہم چاہتے ہیں کہ اسے پاکستان کا سب سے محفوظ شہر قرار دیا جائے اور یہاں 30 فیصد جرائم میں کمی ہوئی ہے۔وزیر داخلہ نے کہا کہ سینیٹ کا الیکشن ہی اب اصل مسئلہ ہے، اگر سپریم کورٹ فیصلہ دے دیتی ہے اور شو آف ہینڈز ہو جاتا ہے تو میرے خیال میں اس ملک میں الیکشن میں یہ کہنا ہے کہ دھاندلی ہوئی ہے، ختم ہو جائے گا اور اس کا کریڈٹ عمران خان کو جاتا ہے۔
