اسلام آباد(این این آئی)وزیر اعظم عمران خا ن نے افغانستان میں تشدد کے واقعات پر تشویش کا اظہار کرتے ہوئے تمام فریقین پرتشدد میں کمی لانے پر زور دیا ہے تاکہ جنگ بندی کیلئے راستہ ہموار ہو سکے ،۔ وزیراعظم عمران خان سے ملا عبدالغنی برادرکی قیادت میں افغان طالبان کے سیاسی وفد نے ک۔ ملاقات میں افغان امن عمل میں پیش رفت سے متعلق تبادلہ خیال کیا گیا۔وزیراعظم عمران خان نے کہا کہ افغانستان میں تنازعات کا کوئی فوجی حل نہیں ہے، انٹرا افغان مذاکرات پائیدارامن اوراستحکام کے حصول کے لئے ایک تاریخی موقع ہے، امید ہے افغان اسٹیک ہولڈرزانٹرا افغان مذاکرات میں پیشرفت کے لیے مثبت کردارادا کرتے رہیں گے۔ملاقات کے بعد جاری کردہ اعلامیے کے مطابق وزیراعظم عمران خان نے وسیع البنیاد اورجامع سیاسی تصفیے کے لئے پاکستان کی مستقل حمایت کا اعادہ کرتے ہوئے امن عمل خراب کرنے والوں کے کردارسے بھی محتاط رہنے کی ضرورت پرزوردیا۔عمران خان نے اس امید کا اظہار کیاکہ افغانستان میں امن اور سلامتی کی بحالی خطے میں اقتصادی ترقی کو فروغ دیگا ۔ بیان میں کہاگیاکہ طالبان کا پاکستان کا دورہ پاکستان کی افغان امن عمل کی سہولت کاروں میں کوششوں کا حصہ ہے جس کا مقصد ایک پر امن مستحکم ، متحد ، آزاد ، خود مختار اور خوشحال افغانستان ہے ۔یاد رہے کہ افغان طالبان کا وفد بدھ کو پاکستان کے تین روزہ دورے پرآیا تھا اور گزشتہ روز افغان طالبان کے وفد نے وزیر خارجہ شاہ محمود قریشی سے بھی ملاقات کی تھی ۔
