اسلام آباد( این این آئی) پاکستان تحریک انصاف کے سینئر مرکزی رہنماوسابق وفاقی وزیر ہمایوں اختر خان نے کہاہے کہ پی ڈی ایم لانگ مارچ کرے یا شارٹ مارچ کرے ان کے من کی مراد کبھی پوری نہیںہو گی ،سینیٹ انتخابات میں تحریک انصاف اکثریتی جماعت کے طورپر ابھرے گی اور وزیر اعظم عمران خان مزید مضبوط ہوں گے،اپوزیشن جماعتیں جس ادارے کی سیاست میں مداخلت کی مخالفت کرتی ہے اسی سے اپنے مستقبل کی امیدیں بھی وابستہ کئے ہوئے ہیںکیا یہ کھلاتضاد نہیں ۔اپنے دفتر میں پارٹی رہنمائوں اورصحافیوںسے گفتگو کرتے ہوئے ہمایوں اخترخان نے کہا کہ ہماری لیگل ٹیم کی سوچ یہ ہے کہ سینیٹ انتخابات الیکشن ایکٹ2003ء کے تحت ہوں اور اس میں ایک گنجائش موجودہے کہ طریق کار بدلا جا سکے جو بیشک شو آف ہینڈ کی بجائے کوئی اور طریقہ ہولیکن سیکرٹ کی بجائے اوپن بیلٹ ہو ،اس کے لئے کوئی اور بھی طریقہ نکالا جا سکتاہے ۔انہوں نے کہا کہ اس طریق کا مقصد کوئی ڈریا خوف نہیںبلکہ سینیٹ انتخابات کو شفاف اورکرپشن فری بنانے کی کوشش ہے جس کی ماضی کے ہر دورمیں شکایات سامنے آتی رہی ہیں۔انہوں نے کہا کہ اپوزیشن کو ہمیشہ یہی شکوہ ہوتاہے بر سر اقتدارجماعت مداخلت کر سکتی ہے تو پھر آج اپوزیشن سینیٹ انتخابات کی شفاف کے لئے حکومتی اقدامات پر کیوںعدالت جانے کی بات کرتی ہے،آئیں طریق کار طے کرنے کے لئے ہمارے ساتھ بیٹھیںکیونکہ ہم اس نظام کو شفاف بناناچاہتے ہیں چاہے ہمیں اس سے فائدہ یا نقصان ہو ۔ہمایوں اخترخان نے کہاکہ لاہور جلسے میں ”عوام کا ٹھاٹھیںمارتا سمندر” اپوزیشن نے بھی اپنی آنکھوں سے دیکھ لیا ہے اس لئے اب پی ڈی ایم کی بڑھکیں صرف دیوانے کی بڑ ہیں۔
