شیخوپورہ (این این آئی)پاکستان مسلم لیگ (ن) کے مرکزی سینئر رہنما و چیئرمین پبلک اکاؤنٹس کمیٹی رانا تنویر حسین ایم این اے نے کہا ہے کہ نااہل اور نالائق وزیر اعظم این آر او کے رونے دھونے کو چھوڑیں اپنا استعفیٰ تیار رکھیں پی ڈی ایم لانگ مارچ بھی کرے گی اور اسمبلیوں سے مستعفی بھی ہوگی یہ کسی غلط فہمی میں نہ رہیں کہ اب اپوزیشن انہیں این آر او دے گی جب بھی ان سے ڈوبتی معیشت، مہنگائی، بے روزگاری، ناکام خارجہ و داخلہ پالیسی پر سوال کرتے ہیں تو جواب میں این آر او کا رونا دھونا شروع ہوجاتا ہے، مسلم لیگ (ن) نیچے سے لیکر اوپر تک متحد اور منظم ہے تمام پارلیمنٹیرینز اور تنظیمی ونگز میاں نواز شریف کے بیانیہ کے ساتھ کھڑے ہیں اور ان نااہل حکمرانوں کو بھگانے میں سنجیدہ اورہر قربانی دینے کیلئے تیار ہیں، وکٹ کے دونوں جانب کھیلنے کی بات میں دم نہیں یہ بیان دینے والے کی ذہنی اختراع ہے۔ ان خیالات کا اظہار انہوں نے سابق وفاقی وزیر چوہدری برجیس طاہر کی ہمشیرہ اور سماجی رہنما چوہدری ناظم حسین ورک کی اہلیہ کے انتقال پر تعزیت کے بعد صحافیوں سے گفتگو کرتے ہوئے کیا، اس موقع پر ارکان اسمبلی پیر سید اشرف رسول، میاں عبدالرؤف، سابق ضلع صدر حاجی محمد نواز، ضلعی صدر خواتین ونگ بینش قمر ڈار،ضلعی سئنیر نائب صدر رانا خلیل احمد گادی ،حاجی طارق محمود ڈوگر، حاجی احمد خاں ورک بھی موجود تھے، رانا تنویر حسین ایم این اے نے کہا کہ ڈھائی سال گزر چکے ان حکمرانوں کی سمت ہی درست نہیں ہوسکی، تمام دعوے اور وعدے ریت کی دیوار ثابت ہوئے، عوام کو ریلیف دینے کی بجائے الٹا قربانی مانگ رہے ہیں حکمرانوں کا کام حالات کو درست کرنا، معیشت کی بحالی، امن و امان کا قیام اور روزگار کے مواقع فراہم کرنے سمیت اشیائ خوردونوش کی سستے داموں فراہمی سمیت دیگر بنیادی سہولیات کی فراہمی ہوتا ہے یہ ملکی تاریخ کی پہلی حکومت ہے جو عوام کو کچھ دینے کی بجائے اپنی ہر خرابی اور نااہلی برداشت کرنے کی بات کررہی ہے، یہ اپنی نالائق تسلیم کریں اور اقتدار سے الگ ہو جائیں عوام انہیں مزید وقت دینے کیلئے تیار نہیں اور نہ ہی پی ڈی ایم اب انہیں کوئی محفوظ راستہ دے گی۔
