لاہور( این این آئی)انصاف ویلفیئر ونگ کے مرکزی سیکرٹری جنرل جمشید اقبال چیمہ نے کہا ہے کہ قومی اداروں کے خلاف ہرزہ سرائی کی کڑیاں کہاں جا کر ملتی ہیں ایک دن ضرور قوم کے سامنے آئے گا، عوام قومی اداروں کے خلاف ہرزہ سرائی کرنے والوں کا محاسبہ کریں گے، اپوزیشن انتشار کی سیاست کی فضا بنا رہی ہے جس کا مقصد دبائو بڑھا کر اپنے لئے ریلیف حاصل کرناہے لیکن ان کے ہتھکنڈے اپنے گلے پڑ جائیں گے۔پارٹی دفتر میں حلقہ این اے 127کے وفد سے ملاقات میں گفتگو کرتے ہوئے جمشید اقبال چیمہ نے کہا کہ جب سے حکومت اقتدار میں آئی ہے اپوزیشن مفاہمت کے نام پر این آراو کیلئے کوشاںہے لیکن وزیر اعظم عمران خان واضح کہہ چکے ہیں کرپشن کیسز پر کوئی سمجھوتہ نہیں ہوگا ، جب اپوزیشن کی این آر او کی دال نہیں گلی تو حکومت اور اداروں کے خلاف محاذ کھول دیا گیا اور گمراہ کن پراپیگنڈا کیا جارہا ہے
