اسلام آباد (این این آئی)وفاقی وزیر اطلاعات سینیٹر شبلی فراز نے کہا ہے کہ حق خودارادیت انسان کا بنیادی پیدائشی اور عالمی قانونی حق ہے، دنیا مقبوضہ کشمیر میں انسانیت کے خلاف بھارتی جرائم پرخاموشی توڑے۔ ٹوئٹر پر اپنے بیان میں وزیر اطلاعات نے کہاکہ حق خودارادیت انسان کا بنیادی پیدائشی اور عالمی قانونی حق ہے،یہ انسانی عظمت ووقار کے تقاضوں کاایک لازمی جزو ہے۔ انہوںنے کہاکہ اسکی نفی انسانی آزادی،قدروں اوراصولوں کاانکار ہے۔ انہوںنے کہاکہ کشمیری حریت پسندوں کوسلام عقیدت پیش کرتے ہیں جنہیں کوئی جبروظلم اس جائز،بنیادی جمہوری حق کے حصول کی جدوجہدسے ہٹانہ سکا۔ انہوںنے کہا کہ یہ دن اقوام متحدہ کو یاد دلاتا ہے کہ سیکورٹی کونسل کی5جنوری 1949ء کومقبوضہ جموں و کشمیر کے عوام کے مستقبل کیلئے حق خودارادیت دینے کی قرارداد پر تاحال عمل نہیں ہوا۔ وفاقی وزیر نے کہاکہ دنیا مقبوضہ کشمیر میں انسانیت کے خلاف بھارتی جرائم پرخاموشی توڑے۔ وفاقی وزیر نے کہاکہ وزیراعظم عمران خان ہر عالمی فورم پر کشمیریوں کے وکیل اور سفیر بن کر بہادر کشمیریوں کا مقدمہ بھرپور انداز سے لڑ رہے ہیں اور بھارت کا سیاہ چہرہ بے نقاب کرتے رہیں گے۔
