اسلام آباد (این این آئی)ترجمان دفتر خارجہ زاہد حفیظ نے کہا ہے کہ پاکستان سعودی عرب اور قطر کے درمیان زمینی فضائی اور بحری سرحدیں دوبارہ کھولنے کے فیصلے کا خیر مقدم کرتا ہے۔ اپنے بیان میں ترجمان دفتر خارجہ نے کہاکہ پاکستان مشرق وسطی میں اہم مثبت پیش رفت کا خیر مقدم کرتا ہے،پاکستان سعودی عرب اور قطر کے درمیان زمینی فضائی اور بحری سرحدیں دوبارہ کھولنے کے فیصلے کا خیر مقدم کرتا ہے ،ہم گلف تعاون کونسل کی جانب سے گذشتہ چار سال سے ممالک کے درمیان حل طلب مسائل کے حوالے سے اقدامات کا بھی خیر مقدم کرتے ہیں ،پاکستان امیر کویت کی جانب سے خلیج تعاون کونسل ممالک کے مابین اختلافات ختم کروانے کے لیے ادا کردہ مثبت کردار کوسراہتا ہے ،ان کی مسلسل اور مخلصانہ کاوشوں اور جی سی سی ممالک کے باہمی تعاون کے مثبت اور حوصلہ افزا نتائج سامنے آ رہے ہیں ،ہم امید کرتے ہیں کہ جی سی سی کے العلاء میں ہونے والے اجلاس سے حوصلہ افزاء پیش رفت ہوگی ۔ ترجمان نے کہاکہ خلیج تعاون کونسل کے ممالک کے درمیان اعتماد مزید بڑھے گا ،پاکستان جلیج تعاون کونسل اور اس کے ساتھ اس کے رکن ممالک کے ساتھ اپنے تعلقات کو بہت اہمیت دیتا ہے ۔
