جکارتہ (این این آئی) انڈونیشیا کے حکام نے بتایا ہے کہ انھیں وہ مقام مل گیا ہے جس کے متعلق انھیں یقین ہے کہ دارالحکومت جکارتہ سے اڑان بھرنے کے فورا بعد غائب ہونے والا بوئنگ 737 مسافر بردار طیارہ سمندر میں گرا تھا۔ سری وجائیا ایئر کے اس طیارے پر 62 افراد سوار تھے اور یہ طیارہ جکارتہ سے پونتیانک جا رہا تھا مگر اڑان بھرنے کے چار منٹ بعد ہی ریڈار سے غائب ہوگیا۔میڈیارپورٹس کے مطابق حکام نے بتایاکہ بحریہ کے غوطہ خوروں کے ساتھ 10 سے زائد کشتیاں بھی اس مقام پر بھیج دی گئی ہیں۔تفتیش کار ان اشیا کا تجزیہ کررہے ہیں جن کے بارے میں یقین ہے کہ وہ گرنے والے جہاز کے ملبے کا حصہ ہیں۔جکارتہ پولیس کے ترجمان یوسری یونس نے بتایا کہ سرچ اور ریسکیو ایجنسی سے دو بیگ ملے ہیں۔انھوں نے بتایا پہلے بیگ میں مسافروں کی اشیا تھیں جبکہ دوسرے بیگ میں جسم کے اعضا موجود تھے۔ انھوں نے مزید کہا: ہم ان اشیا کی شناخت کرنے کی کوشش کر رہے ہیں۔رات کے وقت تلاش اور ریسکیو کی کوششوں کو روک دیا گیا تھا لیکن اتوار کی صبح سے کام دوبارہ شروع کردیا گیا ہے۔ تلاش میں مدد کے لیے چار طیارے بھی تعینات کردیے گئے ہیں۔
