لاہور( این این آئی)نامور گلوکارہ شبنم مجید نے کہا ہے کہ میں نے اپنی زندگی موسیقی کے لئے وقف کر رکھی ہے اور خاص طور پر نئے ٹیلنٹ کو پروموٹ کرنے کے لئے ہر وقت حاضر ہوں، خواہش ہے کہ موسیقی کے میدان میں لگائے گئے میرے پودے پروان چڑھیں ۔خصوصی گفتگو کرتے ہوئے شبنم مجید نے کہا کہ پاکستان میں ایسے ایسے گلوکار موجود ہیں جن کا کوئی جواب نہیں مگر ان کو اچھا پلیٹ فارم میسر نہیں آتا اور اسی وجہ سے ہم ان کی صلاحیتوں سے فائدہ نہیں اٹھا سکتے ۔ میوزک اکیڈمی بنا کر میں نے اس شعبے کی حقیر سی خدمت کرنے کی کوشش کی ہے اور یہاں آنے والوں کی بھرپور رہنمائی کی جاتی ہے۔شبنم مجید نے کہا کہ مجھے قوی امید ہے کہ میری میوزک اکیڈمی سے نامور گلوکار پیدا ہوں گے جو ایک دن اپنے ملک کا نام روشن کریں گے۔
