اسلام آباد (این این آئی)وفاقی وزیر اطلاعات سینیٹر شبلی فراز نے کہا ہے کہ پی ڈی ایم تحریک نہیں رہی، اس کی جان نکل چکی ہے، اپوزیشن کے پاس صرف مایوسی، ناکامی اور ہزیمت باقی رہ گئی ہے،براڈ شیٹ معاملے نے این آر او کی سیاست کو آشکار کیا،یہ ان کے لیے پانامہ دو ثابت ہوگا،پختہ عزم اور ثابت قدمی عمران خان کی پہچان ہے، قوم کا مال لوٹنے والے قومی مجرموں کو حساب دینا ہوگا۔ اپنے بیان میں انہوںنے کہاکہ پی ڈی ایم تحریک نہیں رہی، اس کی جان نکل چکی ہے، اپوزیشن کے پاس صرف مایوسی، ناکامی اور ہزیمت باقی رہ گئی ہے۔ انہوںنے کہاکہ منتخب حکومت گرانے کی خواہش رکھنے والے عوام کی نظروں سے گر گئے۔ انہوںنے کہاکہ (ن) لیگی راہنما بوکھلاہٹ کا شکار ہیں۔ سینیٹر شبلی فراز نے کہاکہ براڈ شیٹ معاملے نے این آر او کی سیاست کو آشکار کیا،یہ ان کے لیے پانامہ دو ثابت ہوگا۔ انہوںنے کہاکہ عمران خان جب غریبوں کے لئے کینسر ہسپتال اور یونیورسٹیاں بنا رہا تھا تو نواز شریف اور آصف زرداری غریبوں کو لوٹ کر ایون فیلڈ اور سرے میں محل تعمیر کر رہے تھے۔ سینیٹر شبلی فراز نے کہا کہ (ن )لیگی رہنما جھوٹ بول کر عوام کو گمراہ نہیں کر سکتے۔ انہوںنے کہاکہ پختہ عزم اور ثابت قدمی عمران خان کی پہچان ہے، قوم کا مال لوٹنے والے قومی مجرموں کو حساب دینا ہوگا۔
