راولپنڈی (این این آئی) سابق چیئرمین پی سی بی رمیز راجہ نے کہا کہ پاکستانی قوم چار دن کے اندر قوم بن کر ابھری ہے۔سابق چیئرمین پی سی بی رمیز راجہ نے میڈیا سینٹر میں صحافیوں کی جانب سے یوم تشکر کی تقریب سے خطاب کرتے ہوئے کہا کہ ہر مشکل کے بعد ہیرو بننے کا موقع ہوتا ہے جو پاکستان نے کرکے دکھایا، کرکٹ میں پریشر ہوتا ہے، گریٹ کھلاڑی پریشر صورتحال سے گزر کر بنتے ہیں۔رمیز راجہ کا کہنا تھا کہ پاکستانی قوم بھی مشکلات کا شکار تھی لیکن ہیرو بن کر ابھری، بھارت نے لحاظ نہیں کیا اور کرکٹ کے میدان پر حملہ کردیا، پانی اور کرکٹ پر کوئی خاندانی قوم حملہ نہیں کرتی، قوم میں اعتماد دیکھ کر بہت خوش ہوا ہوں۔سابق چیئرمین پی سی بی نے کہا کہ کرکٹ پاکستان کی پہچان ہے، دنیا بھر میں ہیڈلائنز بناتی ہے، مجھے افسوس ہوتا ہے کہ پاکستان کئی شعبوں میں اوپر کیوں نہیں گیا، پاکستان میں ہر فرد کرکٹ کا سٹیک ہولڈر ہے۔انہوں نے مزید کہا کہ کرکٹ ہے تو ہماری عزت ہے، پاکستانی کرکٹ کو اوپر لے کر جانا ہے کیونکہ کرکٹ سے پاکستان کی عزت ہے
