لاہور( این این آئی)آل پاکستان گڈز ٹرانسپورٹ اونرز ایسوسی ایشن کے مرکزی رہنما حاجی محمد عارف نے کہاہے کہ موٹروے پولیس جرمانے کی آڑ میں مال اکٹھا کرنے کی بجائے لاقانونیت ختم کرائے، عدالتی احکامات ایکسل لوڈ قانون پر مکمل عملدرآمد کروانے کی بجائے اس قانون کو کمائی کا ذریعہ بنا لیا گیا ہے۔ ان خیالا ت کااظہار انہو ں نے آل پاکستان گڈز ٹرانسپورٹ اونرز ایسوسی ایشن کے رہنمائوں چوہدری عاطف ، چوہدری گل شیر ، چوہدری بشارت ، حاجی ظفر ، چوہدری مزمل ، ماجدزمان اعوان ، اعجاز گجر ، حاجی امتیاز اور دیگر عہدیداران سے گفتگو کر تے ہو ئے کیا۔انہوں نے کہاکہ موٹروے پولیس نے اگر عدالتی احکامات جس میں اوور لوڈنگ کے خاتمے اور ایکسل لوڈ قانون پر مکمل عملدرآمد کی ہدایت کی گئی ہے اس پر عمل نہ کرایاتو ہم احتجاج پر مجبور ہو جائیں گے ،عدالت نے بھاری جرمانے کرنے کا نہیں بلکہ اوور لوڈنگ کو ختم کرانے اور ایکسل لوڈ قانون پر سختی کے ساتھ مکمل عملدرآمد کرانے کے احکامات جاری کئے ہیں۔جو روش موٹروے پولیس نے اپنائی ہوئی ہے وہ ناقابل قبول ہے ۔انہو ں نے کہاکہ پورے ملک میں ایک قانون کا نفاذ کیا جائے جو قانون موٹرویز پر لاگو ہے وہی قانون دیگر قومی شاہراہوں پر بھی لاگو کیا جائے۔
