اسلام آباد (این این آئی)وزیر خارجہ مخدوم شاہ محمود قریشی نے 23 مارچ یوم پاکستان کے حوالے سے اپنے بیان میں کہاکہ میں پوری قوم کو یوم پاکستان کی مبارک باد پیش کرتا ہوں۔ انہوںنے کہاکہ ہمارے بزرگوں نے بڑی مشکلات سے گزر کر یہ وطن حاصل کیا اب ہماری ذمہ داری اسے مستحکم بنانا ہے،ہمیں ایک قوم اور ایک سوچ کو لیکر آگے بڑھنا ہو گا۔ انہوںنے کہاکہ ہماری زبان مختلف ہو سکتی ہے لیکن ہماری دلوں کی دھڑکن، ہمارے چیلنجز اور ہمارے دوست، دشمن اکٹھے ہیں یہی ایک قوم، ایک منزل کا وژن ہے۔ انہوںنے کہاکہ پاکستانیوں نے بحیثیت قوم مل کر دہشت گردی کے عفریت کا مقابلہ کیا ۔ انہوںنے کہاکہ دہشتگردی کے خلاف جنگ میں، پوری قوم اپنی مسلح افواج کے ساتھ شانہ بشانہ کھڑی رہی الحمد للہ آج ہمارا ملک پرامن ہے انہوںنے کہاکہ کرونا وبائی چیلنج نے پوری دنیا کی معیشت کو متاثر کیا ـ ہمیں بھی معاشی مشکلات کا سامنا ہے جس کے باعث ہمیں مشکل فیصلے کرنا پڑے لیکن میں یوم پاکستان کے موقع پر قوم کو یقین دلانا چاہتا ہوں کہ انشاء اللہ ہم جلد مہنگائی پر قابو پا لیں گے۔ انہوںنے کہاکہ کرونا کی تیسری لہر خطرناک ثابت ہو رہی ہے میری پوری قوم سے گذارش ہے کہ احتیاط کا دامن ہاتھ سے نہ چھوڑیں، انہوںنے کہاکہ گزشتہ رو ز میری چین کے وزیر خارجہ وانگ ڑی کے ساتھ ٹیلیفونک بات ہوئی۔ انہوںنے کہاکہ میں نے کرونا وبا کے دوران پاکستان کی معاونت پر چینی وزیر خارجہ کا شکریہ ادا کیا اور انہیں پاکستان میں جاری ویکسینیشن پروگرام کی تفصیلات سے آگاہ کیا۔انہوںنے کہاکہ ہمیں چین کی جانب سے ”سائنوفارم ”ویکسین کی ایک ملین ڈوزز مارچ کے آخر تک مل جائیں گی،چین نے ہمیں کرونا ویکسین کی مزید 4 ملین ڈوزز مہیا کرنے پر آمادگی کا اظہار کیا ہے ۔ انہوںنے کہاکہ کشمیر کے مسئلے پر ہم سب ایک تھے ایک ہیں اور ایک رہیں گے۔ انہوںنے کہاکہ یوم پاکستان کے موقع پر ہم کشمیریوں کو یہ واضح پیغام دینا چاہتے ہیں کہ آپ اس جدوجہد میں تنہا نہیں ہیں ، آپ حق پر ہیں انشا ء اللہ آپ اپنے مقصد ”حق خودارادیت”کے حصول میں ضرور کامیاب ہوں گے۔
