اسلام آبا د(این این آئی)چیئرمین سینیٹ محمد صادق سنجرانی سے جنوبی کوریا کے سفیر نے پارلیمنٹ ہاوس میں ملاقات کی جس میں باہمی دلچسپی کے امور سمیت دوطرفہ تعلقات اور علاقائی صورتحال پر تبادلہ خیال کیا گیا ۔ چیئر مین سینٹ نے کہاکہ پاکستان کے لوگ کوریا کے ساتھ تعلقات کو انتہائی عزت کی نگاہ سے دیکھتے ہیں، جنوبی کوریا کاامن ، جمہوریت اور خوشحالی کے راستے پر سفر قابل تحسین ہے۔ صادق سنجرانی نے کہاکہ چند دہائیوں کے قلیل عرصے میں کوریانے خود کو تکنیکی لحاظ سے ترقی یافتہ معیشت میں تبدیل کر دیا ہے۔ انہوںنے کہاکہ پاکستان جنوبی کوریا کے ساتھ اپنے کثیر الجہتی تعلقات کو انتہائی اہمیت دیتا ہے جس میں باہمی تعاون کے سیاسی ، اقتصادی ، سائنسی ، دفاعی ، ثقافتی اور دیگر شعبے شامل ہیں۔ انہوںنے کہاکہ افغانستان میں حالیہ بدلتی ہوئی صورتحال کو مدنظر رکھتے ہوئے پاکستان نے 16000 سے زائد غیر ملکی شہریوں کو بحفاظت وطن پہنچایا۔ چیئرمین سینٹ نے کہاکہ جنوبی کوریا کی درخواست پرپاکستان نے 392 کورین باشندوں کو بحفاظت کابل سے نکال لیا ہے، دونوں رہنماوں نے قومی اور بین الاقوامی سطح پر مشترکہ مفادات کے حوالے سیباہمی تعاون اور باہمی تفہیم کو مزید بڑھانے پر زور دیا۔ صادق سنجرانی نے کہاکہ پاکستان کوریا کے ساتھ اپنے معاشی تعلقات کو بہت اہمیت دیتا ہے، پچھلے دو سالوں میں کورین کمپنیوں نے پاکستان میں اپنی موجودگی اور مارکیٹ شیئر میں بتدریج اضافہ کیا ہے۔ صادق سنجرانی نے کہاکہ پاکستان اور کوریا کے درمیان 1.122 بلین امریکی ڈالر کی موجودہ باہمی تجارت دونوں ممالک کی صلاحیت سے بہت کم ہے۔ انہوںنے کہاکہ باہمی تجارت کو فروغ دینے کیلئے فعال اقدامات اٹھانے کی ضرورت ہے، تجارت کے فروغ کیلئے فری ٹریڈ ایگریمنٹ دونوں ممالک کے لیے فائدہ مند ثابت ہوگا
