ماسکو (این این آئی)روس نے کہا ہے کہ اس نے جانوروں کے لیے دنیا کی پہلی کورونا ویکسین رجسٹر کی ہے۔فرانسیسی خبر رساں ادارے اے ایف پی کے مطابق روس کا کہنا ہے کہ ‘اس اقدام سے وائرس کے شکل بدلنے کے عمل کو روکا جا سکے گا۔زراعت کو دیکھنے والی ایجنسی روسلخوزنادزور نے ایک بیان میں کہا ہے کہ ‘ویکسین کی بڑے پیمانے پر پیداوار اپریل میں شروع کی جا سکتی ہے۔کارنیواک کوو کے نام سے تیار کی جانے والی ویکسین کے بارے میں بتایا گیا ہے کہ کتوں، بلیوں، لومڑیوں اور دیگر جانوروں پر اس کے تجربات گذشتہ سال اکتوبر میں کیے گئے تھے اور یہ ان پر مؤثر ثابت ہوئی ہے۔ایجنسی کے نائب سربراہ کونسٹنٹین ساوینکوو نے بتایا کہ جتنے بھی جانوروں کو یہ ویکسین دی گئی ہے سو فیصد میں کورونا کے اینٹی باڈیز پیدا ہوئے۔ان کا کہنا تھا کی یہ دنیا کی سب سے پہلی اور واحد ویکسین ہے جو جانوروں میں کورونا کے وائرس کو روکے گی۔ایجنسی روسلخوزنادزور نے ایک بیان میں کہا کہ اس ویکسین کی پیداوار سے جانوروں میں کورونا کے وائرس کے شکل بدلنے کو روکا جا سکے گا۔ بیان میں ڈنمارک کی مثال دی گئی جہاں گزشتہ برس 15 لاکھ آبی نیولوں کو اس وقت تلف کیا گیا جب ان میں سے کچھ میں وائرس کی تبدیل شدہ شکل سامنے آئی۔بیان کے مطابق روسی سائنسدانوں نے کہا ہے کہ کارنیواک ویکسین کے استعمال سے جانوروں کورونا وائرس سے محفوظ رہیں گے۔روسلخوزنادزور نے بتایا ہے کہ یونان، پولینڈ، آسٹریا، امریکہ، کینیڈا اور سنگاپور کی نجی کمپنیوں اور جانور پالنے والے اداروں نے کارنیواک کوو ویکسین خریدنے میں دلچسپی ظاہر کی ہے۔
