واشنگٹن(این این آئی) امریکا نے خلیج عمان میں اسرائیل کے زیرانتظام ایک تیل بردار بحری جہاز پرحملے کے ردعمل میں ایران کو اجتماعی جواب دینے کے عزم کا اظہارکیا ہے۔میڈیارپورٹس کے مطابق امریکی وزیرخارجہ انٹونی بلینکن نے محکمہ خارجہ میں صحافیوں سے گفتگو کرتے ہوئے کہا کہ ہم برطانیہ، اسرائیل ، رومانیہ اور دوسرے ممالک سے قریبی رابطے میں ہیں اور اب (حملے جواب میں)ہمارا اجتماعی ردعمل ہوگا۔بلینکن نے پہلی مرتبہ دوٹوک الفاظ میں ایران پر گذشتہ جمعہ کو مرسراسٹریٹ ٹینکر پر ڈرون حملے میں ملوث ہونے کا الزام عاید کیا جبکہ ایران نے اس حملے میں ملوث ہونے کی تردید کی ہے۔ڈرون کے جہاز سے ٹکرانے کے بعد عملہ کے دوارکان ہلاک ہوگئے تھے۔امریکی وزیرخارجہ نے کہا کہ ہم نے واقعے کا مکمل جائزہ لیا ہے اور ہمیں یقین ہے کہ ایران ہی نے یہ حملہ کیا تھا۔
